സാങ്കേതിക പുരോഗതയിലേക്കും സാങ്കേതിക സ്വാശ്രയത്വത്തിലേക്കുമുള്ള ഇന്ത്യയുടെ യാത്രയക്ക് ശക്തിപകരാന്‍ പുതിയ പരം രുദ്ര സൂപ്പര്‍ കംപ്യൂട്ടിങ് സിസ്റ്റം രാജ്യത്തിന് സമര്‍പ്പിച്ച് പ്രധാനമന്ത്രി നരേന്ദ്രമോദി. സെന്റര്‍ ഫോര്‍ ഡെവലപ്പ്‌മെന്റ് ഓഫ് അഡ്വാന്‍സ്ഡ് കംപ്യൂട്ടിങ് (സി-ഡാക്ക്) തദ്ദേശീയമായി വികസിപ്പിച്ച ഈ സൂപ്പര്‍ കംപ്യൂട്ടര്‍ രാജ്യത്തിന്റെ കംപ്യൂട്ടിങ് ശേഷി വര്‍ധിപ്പിക്കും. പരമിശിവന്റെ അവതാരത്തിന്റെ പേരാണ് ഈ സൂപ്പര്‍ കംപ്യൂട്ടറിന് നല്‍കിയിരിക്കുന്നത്. സയന്‍സ്, എഞ്ചിനീയറിങ് മേഖലകളിലെ വിവിധങ്ങളായ ആവശ്യങ്ങള്‍ക്ക് വേണ്ടിയുള്ള സങ്കീര്‍ണമായ കംപ്യൂട്ടിങ് ജോലികള്‍ ചെയ്യുന്നതിന് വേണ്ടിയാണ് ഇത് രൂപകല്‍പന ചെയ്തിരിക്കുന്നത്. ഗവേഷണ, വികസന രംഗത്തും ആര്‍ട്ടിഫിഷ്യല്‍ ഇന്റലിജന്‍സ്, മെഷീന്‍ ലേണിങ്, ഡാറ്റാ അനലറ്റിക്‌സ് മേഖലകളിലും സൂപ്പര്‍ കംപ്യൂട്ടറുകള്‍ അനിവാര്യമാണ്. നാഷണല്‍ സൂപ്പര്‍ കംപ്യൂട്ടിങ് മിഷന് കീഴില്‍ 130 കോടി ചിലവില്‍ മൂന്ന് പരം രുദ്ര സൂപ്പര്‍ കംപ്യൂട്ടറുകളാണ് നിര്‍മിച്ചിരിക്കുന്നത്. സമ്പദ്വ്യവസ്ഥയോ എളുപ്പം ബിസിനസ്സ് ചെയ്യുന്നതിനോ ദുരന്തനിവാരണ ശേഷിയോ ജീവിതസൗകര്യമോ ആകട്ടെ, സാങ്കേതികവിദ്യയെയും കംപ്യൂട്ടിങ് കഴിവുകളെയും നേരിട്ട് ആശ്രയിക്കാത്ത ഒരു മേഖലയുമില്ല. ഇന്‍ഡസ്ട്രി 4.0-യിലെ ഇന്ത്യയുടെ വിജയത്തിന്റെ ഏറ്റവും വലിയ അടിത്തറയാണ് ഈ മേഖലയെന്ന് പ്രധാനമന്ത്രി നരേന്ദ്രമോദി പറഞ്ഞു. ഇന്ത്യ സ്വന്തം സെമികണ്ടക്ടര്‍ ഇക്കോസിസ്റ്റം നിര്‍മിച്ചുവരികയാണെന്നും അത് ആഗോള വിതരണ ശൃംഖലയുടെ മുഖ്യ ഭാഗമായി മാറുമെന്നും അദ്ദേഹം കൂട്ടിച്ചേര്‍ത്തു. പുണെ, ഡല്‍ഹി, കൊല്‍ക്കത്ത എന്നിവിടങ്ങളിലാണ് മൂന്ന് സൂപ്പര്‍ കംപ്യൂട്ടറുകള്‍ സ്ഥാപിച്ചിരിക്കുന്നത്. പൂണെയിലെ ജയന്റ് മീറ്റര്‍ റേഡിയോ ടെലിസ്‌കോപ്പ് (ജിഎംആര്‍ടി) ഫാസ്റ്റ് റേഡിയോ ബര്‍സ്റ്റുകളും (എഫ്ആര്‍ബി) മറ്റ് ജ്യോതിശാസ്ത്ര സംഭവങ്ങളും പഠിക്കാന്‍ സൂപ്പര്‍ കംപ്യൂട്ടര്‍ ഉപയോഗിക്കും. ഡല്‍ഹിയിലെ ഇന്റര്‍-യൂണിവേഴ്‌സിറ്റി ആക്‌സിലറേറ്റര്‍ സെന്റര്‍ (ഐയുഎസി) മെറ്റീരിയല്‍ സയന്‍സിലും ആറ്റോമിക് ഫിസിക്‌സിലും ഗവേഷണം നടത്തും. അതേസമയം, എസ്.എന്‍. കൊല്‍ക്കത്തയിലെ ബോസ് സെന്റര്‍ ഫിസിക്സ്, കോസ്മോളജി, എര്‍ത്ത് സയന്‍സ് എന്നിവയില്‍ ഉന്നത പഠനത്തിന് നേതൃത്വം നല്‍കും. പരം രുദ്രയ്‌ക്കൊപ്പം കാലാവസ്ഥാ ഗവേഷണത്തിനായി പ്രത്യേക ഹൈ പെര്‍ഫോമന്‍സ് കംപ്യൂട്ടിങ് സിസ്റ്റവും പ്രധാന മന്ത്രി അവതരിപ്പിച്ചു. കൂടുതല്‍ കൃത്യമായ പ്രവചനങ്ങള്‍ നടത്താനാകുന്നതോടെ ഇന്ത്യയുടെ കാലാവസ്ഥാ പ്രവചന ശേഷിയില്‍ ഇത് വിപ്ലവം സൃശ്ടിക്കുമെന്നാണ് പ്രതീക്ഷിക്കുന്നത്.
പരം രുദ്ര സൂപ്പര്‍ കംപ്യൂട്ടിങ് സിസ്റ്റം രാജ്യത്തിന് സമര്‍പ്പിച്ച് പ്രധാനമന്ത്രി
