തിരുവനന്തപുരം: സംസ്ഥാനത്ത് പലയിടക്കം കനത്ത മഴ തുടരുനനു. അടുത്ത രണ്ട് ദിവസംകൂടി സമാന സ്ഥിതി തുടരുമെന്ന മുന്നറിയിപ്പാണ് കേന്ദ്ര കാലാവസ്ഥാ നിരീക്ഷണ വകുപ്പ് നല്‍കുന്നത്. മഴയെ തുടര്‍ന്ന് കോട്ടയം, പത്തനംതിട്ട, ആലപ്പുഴ, കൊല്ലം ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി പ്രഖ്യാപിച്ചു. എം.ജി, കേരള സര്‍വ്വകലാശാലകള്‍ നാളെ നടത്താനിരുന്ന മുഴുവന്‍ പരീക്ഷകളും മാറ്റിവച്ചു.
അതേസമയം, വൃഷ്ടിപ്രദേശത്ത് മഴ തുടരുന്നതിനാല്‍ ഇടുക്കി, മുല്ലപ്പെരിയാര്‍ അണക്കെട്ടുകളില്‍ ജലനിരപ്പ് ക്രമാതീതമായി ഉയരുന്നുണ്ട്. ഇടുക്കിയില്‍ ജലനിരപ്പ് 2399.16 അടിയാണ്. മുല്ലപ്പെരിയാറില്‍ ജലനിരപ്പ് 140.45 അടിയായി ഉയര്‍ന്നു. ഇടുക്കിയില്‍ ഇന്ന് ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്.
