ഇടുക്കി: മണ്ണില്‍ പൊന്നുവിളയിച്ച് ഇടുക്കി എആര്‍ ക്യാമ്പിലെ പോലീസ് ഉദ്യോഗസ്ഥര്‍. കുയിലിമല എ.ആര്‍ ക്യാമ്പ് കെട്ടിടത്തിന് പിന്നില്‍ കാടുകയറി കിടന്ന സ്ഥലം വെട്ടിത്തെളിച്ചാണ് പോലീസ് ഉദ്യോഗസ്ഥര്‍ കൃഷി ഇറക്കിയത്.
പടവലം, കോളി ഫ്ളവര്‍, ചീര, പയര്‍, വെണ്ട, വഴുതനം, പച്ചമുളക്, തക്കാളി, കാബേജ് തുടങ്ങിയ വിവിധയിനം പച്ചക്കറികളാണ് ഇവിടെ കൃഷി ചെയ്തത്. കൃഷിയില്‍ സ്വയം പര്യാപ്തത നേടുക എന്ന ലക്ഷ്യത്തോടെ എസ്.ഐമാരായ കെ.കെ സുധാകരന്‍, പി.എച്ച് ജമാല്‍ എന്നിവരുടെ നേതൃത്വത്തില്‍ കൃഷിക്ക് തുടക്കം കുറിച്ചത്. കൃഷിക്കാരനായ പൈനാവ് സ്വദേശി രഘുവും ഇവരെ സഹായിക്കുന്നുണ്ട്. വാഴത്തോപ്പ് കൃഷിഭവന്റെ സഹായത്തോടെയാണ് കൃഷി ചെയ്യുന്നത്. കൃഷി അസിസ്റ്റന്റ് സി. എസ് ദയയും മറ്റു കൃഷി വകുപ്പ് ഉദ്യോഗസ്ഥരും ഇവര്‍ക്കു വേണ്ട സഹായങ്ങള്‍ ചെയ്യുന്നുണ്ട്.
