തിരുവനന്തപുരം: വ്യവസായ, സംരംഭക പ്രവർത്തനങ്ങളിൽ പാരിസ്ഥിതിക, സാമൂഹിക, ഭരണനിർവ്വഹണ ചട്ടക്കൂട് (Environment, Social and Governance – ESG) പ്രയോഗത്തിൽ കൊണ്ടുവരിക എന്ന ലക്ഷ്യത്തോടെ സംസ്ഥാന ഇ.എസ്.ജി നയത്തിന് മന്ത്രിസഭാ യോഗം അംഗീകാരം നൽകി. സമഗ്രമായ ഒരു ഇ.എസ്.ജി നയം അവതരിപ്പിക്കുന്ന ഇന്ത്യയിലെ ആദ്യത്തെ സംസ്ഥാനമാണ് കേരളമെന്ന് വ്യവസായ മന്ത്രി പി. രാജീവ് അറിയിച്ചു.
ഇ.എസ്.ജി തത്വങ്ങൾ പാലിക്കുന്ന നിക്ഷേപങ്ങളെ ആകർഷിക്കുകയും അത്തരം നിക്ഷേപങ്ങൾക്ക് ഏറ്റവും അനുയോജ്യമായ രാജ്യത്തെ ഒന്നാമത്തെ ലക്ഷ്യസ്ഥാനമായി കേരളത്തെ മാറ്റുകയുമാണ് ഈ നയത്തിലൂടെ ലക്ഷ്യമിടുന്നത്. പരിസ്ഥിതിക്കിണങ്ങുന്നതും സമൂഹത്തെ പരിഗണിക്കുന്നതും സുതാര്യമായ ഭരണനിർവഹണം ഉറപ്പുവരുത്തുന്നതുമായ വ്യവസായങ്ങളെ പ്രോത്സാഹിപ്പിക്കുന്നതിനാണ് നയം നടപ്പിലാക്കുന്നത്.
പ്രോത്സാഹനങ്ങളും ഇളവുകളും
ഇ.എസ്.ജി. തത്വങ്ങൾ നടപ്പിലാക്കാൻ സംരംഭങ്ങളെ പ്രോത്സാഹിപ്പിക്കുന്നതിനായി വിവിധ നികുതി ഇളവുകൾ, സബ്സിഡികൾ, വായ്പാ ഇളവുകൾ, സ്റ്റാർട്ടപ്പ് ഇൻകുബേഷൻ, ഡി.പി.ആർ. പിന്തുണ എന്നിവ സർക്കാർ ഉറപ്പാക്കും. പ്രധാന സാമ്പത്തികാനുകൂല്യങ്ങൾ ഇവയാണ്:
- ഇ.എസ്.ജി. പദ്ധതികൾക്ക് 5 വർഷത്തേക്ക് മൂലധന നിക്ഷേപത്തിന്റെ 100% റീഇംബേഴ്സ്മെന്റ് നൽകും.
- സ്ഥിര മൂലധന നിക്ഷേപത്തിന് 10% സബ്സിഡി (പരമാവധി 50 ലക്ഷം രൂപ).
- യന്ത്രസാമഗ്രികൾക്കും സാങ്കേതികവിദ്യകൾക്കും കെ.എസ്.ഐ.ഡി.സി. കുറഞ്ഞ നിരക്കിലുള്ള വായ്പകൾ നൽകും.
- പ്രാദേശിക സംരംഭങ്ങൾക്കുള്ള സർക്കാർ സംഭരണത്തിൽ 20% മാർജിൻ നൽകും.
- ഇ.എസ്.ജിയിലേക്ക് മാറുന്നതിന് നിലവിലുള്ള സംരംഭങ്ങൾക്ക് പ്രത്യേക സബ്സിഡിയും നൽകും.
- പ്രോജക്റ്റ് റിപ്പോർട്ടുകൾ തയ്യാറാക്കുന്നതിന് സഹായം നൽകുന്നതിനായി എം.എസ്.എം.ഇ. ക്ലിനിക്കുകൾ സ്ഥാപിക്കും.
കാലാവസ്ഥാ ലക്ഷ്യങ്ങൾ
പുതിയ ഇ.എസ്.ജി. നയത്തിലൂടെ സംസ്ഥാനം പ്രധാനപ്പെട്ട പാരിസ്ഥിതിക ലക്ഷ്യങ്ങളാണ് മുന്നോട്ട് വെക്കുന്നത്:
- 2040 ആകുമ്പോഴേക്കും പൂർണ്ണമായും പുനരുപയോഗ ഊർജ്ജ ഉപയോഗം കൈവരിക്കുക.
- 2050 ആകുമ്പോഴേക്കും കാർബൺ ന്യൂട്രാലിറ്റി (Carbon Neutrality) കൈവരിക്കുക.
- സോളാർ പാർക്കുകൾ, ഫ്ലോട്ടിംഗ് സോളാർ, കാറ്റാടിപ്പാടങ്ങൾ, ജലവൈദ്യുത നിലയങ്ങൾ, ബയോമാസ് പദ്ധതികൾ എന്നിവയിൽ നിക്ഷേപം പ്രോത്സാഹിപ്പിക്കും.
സാമൂഹിക, ഭരണനിർവഹണ ലക്ഷ്യങ്ങൾ
നയത്തിന്റെ സാമൂഹിക, ഭരണനിർവഹണ തലങ്ങൾ താഴെ പറയുന്ന ലക്ഷ്യങ്ങൾ ഉറപ്പാക്കുന്നു:
- സാമൂഹികം: തൊഴിൽ മേഖലയിൽ സ്ത്രീകളുടെ പ്രാതിനിധ്യം വർദ്ധിപ്പിക്കുക, വൈവിധ്യവും ഉൾപ്പെടുത്തലും ഉറപ്പാക്കുക, മനുഷ്യാവകാശങ്ങളെ ബഹുമാനിക്കുക, സി.എസ്ആർ, ക്ഷേമ സംരംഭങ്ങൾ എന്നിവയിലൂടെ സാമൂഹ്യക്ഷേമം ഉറപ്പുവരുത്തുക.
- ഭരണനിർവഹണം: അഴിമതിക്കെതിരെ ഉറച്ച നിലപാട്, സുതാര്യത ശക്തിപ്പെടുത്തുക, ഇ.എസ്.ജി. വെളിപ്പെടുത്തലുകൾ നിർബന്ധമാക്കുക.
നടപ്പാക്കലും റിപ്പോർട്ടിംഗും
ഇ.എസ്.ജി. തത്വങ്ങൾ ദത്തെടുക്കുന്നതിനുള്ള നോഡൽ ഏജൻസിയായി കെ.എസ്.ഐ.ഡി.സി. (KSIDC) പ്രവർത്തിക്കും. 2030 വരെ അഞ്ച് വർഷത്തേക്കാണ് ഈ നയം പ്രാബല്യത്തിലുണ്ടാവുക.
ദേശീയ, അന്തർദേശീയ മാനദണ്ഡങ്ങൾക്കനുസൃതമായി കേരളത്തിനായി ഒരു ഇ.എസ്.ജി. റിപ്പോർട്ടിംഗ് സംവിധാനം വികസിപ്പിക്കും. ഇ.എസ്.ജി. റേറ്റിംഗുകളും അവാർഡുകളും ഏർപ്പെടുത്തും. കൂടാതെ, സംസ്ഥാനത്തെ ഇ.എസ്.ജി. സംസ്ഥാനമായി ബ്രാൻഡ് ചെയ്യാനും വിപുലമായ ബോധവൽക്കരണ പരിപാടികൾ സംഘടിപ്പിക്കാനും നയം ലക്ഷ്യമിടുന്നു.
