കോവിഡ് പ്രതിരോധ പ്രവർത്തനങ്ങളുമായും ഓക്സിജൻ വിതരണവുമായും ബന്ധപ്പെട്ട് സോഷ്യൽ മീഡിയ അടക്കമുള്ള മാധ്യമങ്ങൾ വഴി വ്യാജ സന്ദേശങ്ങൾ ധാരാളം പ്രചരിക്കുന്നുണ്ട്. ഇത്തരം വ്യാജവാർത്തകൾ പ്രചരിപ്പിക്കുന്നവർക്കെതിരേ ദുരന്ത നിവാരണ നിയമപ്രകാരം പോലീസ് കേസ് രജിസ്റ്റർ ചെയ്യുമെന്ന് എറണാകുളം ജില്ലാ കളക്ടർ എസ്.സുഹാസ് അറിയിച്ചു.
ഓക്സിജൻ വിതരണം ജില്ലാ ഭരണകൂടവും ആരോഗ്യ വകുപ്പുമാണ് നിയന്ത്രിക്കുന്നത്. ഇക്കാര്യത്തിൽ സന്നദ്ധ സംഘടനകൾക്കോ സ്വകാര്യ ഏജൻസികൾക്കോ യാതൊരു പങ്കുമില്ലെന്നും ഓക്സിജൻ വിതരണവുമായി ബന്ധപ്പെട്ട് വ്യാജ സന്ദേശങ്ങൾ പ്രചരിക്കുന്നത് ശ്രദ്ധയിൽപ്പെട്ടതിനെ തുടർന്നാണ് ഈ അറിയിപ്പ് നൽകുന്നതെന്നും അദ്ദേഹം വ്യക്തമാക്കി.
