തിരുവനന്തപുരം: സർക്കാർ ആശുപത്രികളിൽ അവശ്യ മരുന്നുകളുടെ തടസ്സമില്ലാത്ത ലഭ്യത ഉറപ്പാക്കുന്നതിനായി ആരോഗ്യവകുപ്പ് നിരീക്ഷണ സംവിധാനം ഒരുക്കുന്നു. മരുന്നുകളുടെ ലഭ്യത സംബന്ധിച്ച് വിവിധ ഇടങ്ങളിൽ ഉയരുന്ന പരാതികൾ കൃത്യമായി പരിശോധിക്കുകയും യഥാർത്ഥ സ്ഥിതി നേരിട്ട് മനസ്സിലാക്കുകയും ചെയ്ത് മരുന്നുക്ഷാമം ഉണ്ടാകുന്നതിന് മുമ്പുതന്നെ പരിഹാര നടപടി സ്വീകരിക്കുന്നതിനായി ഓരോ ജില്ലയിലും ജില്ലാതല മരുന്ന് ലഭ്യത നിരീക്ഷണ സമിതി (District-level Medicine Availability Monitoring Team) രൂപീകരിക്കാൻ ആരോഗ്യവകുപ്പ് പ്രിൻസിപ്പൽ സെക്രട്ടറിക്ക് ആരോഗ്യ മന്ത്രി കെ. മുരളീധരൻ നിർദ്ദേശം നൽകി.
അഡീഷണൽ ഡി.എം.ഒ (ഹെൽത്ത്) അല്ലെങ്കിൽ ഡെപ്യൂട്ടി ഡി.എം.ഒ (ഹെൽത്ത്) സമിതിയുടെ കൺവീനറായിരിക്കും. ബന്ധപ്പെട്ട ആശുപത്രി സൂപ്രണ്ട്, അസിസ്റ്റന്റ് ഡ്രഗ്സ് കൺട്രോളർ / ഡ്രഗ്സ് ഇൻസ്പെക്ടർ, ഫാർമസി സ്റ്റോർ സൂപ്രണ്ട് / ഫാർമസിയുടെ ചുമതലയുള്ള ഉദ്യോഗസ്ഥൻ, കെ.എം.എസ്.സി.എൽ. വെയർഹൗസ് മാനേജർ എന്നിവർ സമിതി അംഗങ്ങളാകും. കൂട്ടായ ഇടപെടലിലൂടെ മരുന്നുകളുടെ ലഭ്യത സുഗമമാക്കുകയാണ് ലക്ഷ്യമെന്ന് മന്ത്രി കെ. മുരളീധരൻ വ്യക്തമാക്കി.
സ്റ്റോക്കുണ്ട് എന്ന രേഖയിലെ കണക്കിനപ്പുറം രോഗിക്ക് മരുന്ന് ലഭിക്കുന്നുണ്ടോ എന്നതാണ് പ്രധാന മാനദണ്ഡമെന്ന് മന്ത്രി കെ.മുരളീധരൻ പറഞ്ഞു.
സ്റ്റോക്ക് നില മുൻകൂട്ടി നിരീക്ഷിച്ച് കുറവുണ്ടാകാനുള്ള സാധ്യത തിരിച്ചറിഞ്ഞ് ഇടപെടുന്നതിനാണ് പുതിയ സംവിധാനമൊരുക്കുന്നത്. ആശുപത്രികളിലെ യഥാർത്ഥ സ്റ്റോക്ക്, രോഗികളുടെ എണ്ണം, മരുന്നുകളുടെ ഉപയോഗനിരക്ക്, അടുത്ത ദിവസങ്ങളിലും ആഴ്ചകളിലും ഉണ്ടാകാനിടയുള്ള ആവശ്യം, വിതരണത്തിലെ കാലതാമസം എന്നിവ ഒരുമിച്ച് വിലയിരുത്തും.
ജില്ലാതല സമിതി ആശുപത്രികളിലെ രേഖകളെ മാത്രം ആശ്രയിക്കാതെ ഫാർമസികളിലും സ്റ്റോറുകളിലും നേരിട്ട് പരിശോധന നടത്തി മരുന്നുകളുടെ ലഭ്യത വിലയിരുത്തണം. ഒരു ആശുപത്രിയിൽ ആവശ്യത്തിന് മരുന്ന് ലഭ്യമാണെന്ന് രേഖകളിൽ കാണിച്ചാലും ഫാർമസിയിൽ സ്റ്റോക്ക് കുറവാണോ, വിതരണത്തിൽ കാലതാമസമുണ്ടോ, നിലവിലുള്ള സ്റ്റോക്ക് എത്ര ദിവസത്തേക്ക് മതിയാകും തുടങ്ങിയ കാര്യങ്ങളും പരിശോധിക്കണം.
ഒരു ആശുപത്രിയിൽ ചില മരുന്നുകൾ അധികമായി ലഭ്യമാണെങ്കിൽ അവ ആവശ്യമുള്ള മറ്റൊരു ആശുപത്രിയിലേക്ക് എത്തിക്കുന്നതിനും സമിതി ഇടപെടും. നിലവിലുള്ള ചട്ടങ്ങളും നടപടിക്രമങ്ങളും പാലിച്ച് ആവശ്യമായ ആശുപത്രിയിലേക്ക് ലഭ്യമായ സ്റ്റോക്ക് പുനർവിതരണം ചെയ്യുന്നതിനുള്ള സാധ്യത പരിശോധിക്കും. ഇതുവഴി അടിയന്തര സാഹചര്യങ്ങളിൽ പുതിയ വിതരണത്തിനായി മാത്രം കാത്തുനിൽക്കാതെ ലഭ്യമായ മരുന്നുകൾ പരമാവധി കാര്യക്ഷമമായി ഉപയോഗിക്കാൻ കഴിയും.
മരുന്നുകളുടെ ലഭ്യതയിൽ പ്രശ്നമുണ്ടായാൽ ഉത്തരവാദിത്തം പരസ്പരം കൈമാറുന്ന സാഹചര്യം ഒഴിവാക്കി, പ്രശ്നം എവിടെയാണ് സംഭവിച്ചതെന്ന് കണ്ടെത്തി അവിടെത്തന്നെ പരിഹരിക്കുകയാണ് ലക്ഷ്യം.
ജില്ലാതല സമിതി ഓരോ ആഴ്ചയും നേരിട്ടുള്ള പരിശോധനയുടെ അടിസ്ഥാനത്തിൽ മരുന്നുകളുടെ ലഭ്യത സംബന്ധിച്ച റിപ്പോർട്ട് തയ്യാറാക്കി ജില്ലാ ജനറൽ ആശുപത്രികൾ വരെയുള്ള ആശുപത്രികളുടെ റിപ്പോർട്ട് ആരോഗ്യവകുപ്പ് ഡയറക്ടർക്കും മെഡിക്കൽ കോളേജുകളിലെ റിപ്പോർട്ട് മെഡിക്കൽ വിദ്യാഭ്യാസ ഡയറക്ടർക്കും സമർപ്പിക്കണം.
ഓരോ ആശുപത്രിയിലെയും ലഭ്യമായ മരുന്നുകളുടെ പട്ടിക, കുറവുള്ള മരുന്നുകൾ, രോഗികളുടെ എണ്ണത്തിനനുസരിച്ചുള്ള ആവശ്യകത, അടുത്ത കാലയളവിൽ ആവശ്യമായി വരാനിടയുള്ള മരുന്നുകൾ, കുറവിന്റെ കാരണം, കെ.എം.എസ്.സി.എൽ. വഴി ലഭിക്കാനുള്ള മരുന്നുകളുടെ വിവരം, സ്വീകരിച്ച പരിഹാര നടപടികൾ എന്നിവ റിപ്പോർട്ടിൽ ഉൾപ്പെടുത്തും.
ഗുരുതരമായ മരുന്നുക്ഷാമം കണ്ടെത്തിയാൽ പ്രതിവാര റിപ്പോർട്ടിനായി കാത്തിരിക്കേണ്ടതില്ല. വിഷയം ഉടൻ ബന്ധപ്പെട്ട അധികൃതരെ അറിയിച്ച് അടിയന്തരമായി ആവശ്യമായ മരുന്നുകൾ ലഭ്യമാക്കുന്നതിനുള്ള നടപടി സ്വീകരിക്കണമെന്നും നിർദ്ദേശം നൽകിയതായി മന്ത്രി കെ. മുരളീധരൻ വ്യക്തമാക്കി.
സർക്കാർ ആശുപത്രികളിൽ ആവശ്യമായ മരുന്നുകൾ സമയബന്ധിതമായി ലഭ്യമാക്കുന്നതിനൊപ്പം, മരുന്നുകളുടെ ലഭ്യത സംബന്ധിച്ച പരാതികൾക്ക് വേഗത്തിൽ പരിഹാരം കാണുകയും വിതരണ സംവിധാനത്തിലെ പ്രശ്നങ്ങൾ കൃത്യമായി കണ്ടെത്തി പരിഹരിക്കുകയും ചെയ്യുകയാണ് പുതിയ ജില്ലാതല നിരീക്ഷണ സംവിധാനത്തിലൂടെ ആരോഗ്യവകുപ്പ് ലക്ഷ്യമിടുന്നത്.
